ကြက်ဥ တစ်လုံး..စည်းလုံးကြရမဲ့ ပင်လုံဆီ

ချီးမွမ်းရင်..ခုနှစ်ရက်
ကဲ့ရဲ့ရင်လည်း ခုနှစ်ရက်.
ဘာမှ သွေးပျက်ဖို့ မလို
ကဲ့ရဲ့လွယ်သလောက် ချီးမွမ်းဖို့ ကျ ခက်တယ်။

ခရစ်စတိုဖာ ကိုလံဘတ် (Christopher Columbus)
သို့ မဟုတ် နယ်မြေသစ် စူးစမ်းရှာဖွေသူ
ကြမ်းတမ်း အန္တရာယ် ရေလမ်း
အတ္တလန္တိတ်သမုဒ္ဒရာ ဖြတ်သန်း
အနောက်အိန္ဒိယကျွန်းစု နဲ့ တောင်အမေရိကတိုက်
ရှာဖွေ တွေ့ရှိခဲ့တဲ့ သူရဲကောင်း

သူ ဘယ်လောက်ဘဲ တော်တော်..
သူ ဘယ်လောက်ဘဲ ကျော်ကျော်.
မနာလိုသူတွေက ရှိစမြဲ
ဂုဏ်ပြု ညစာဧည့်ခံပွဲ..ညတစ်ည
မခံချင်စရာ နောက်ပြောင်ကျီဆည်။
“ ကိုလန်ဘတ်မှ စွမ်းတယ်ရယ်တဲ့လား
ကျနော် လုပ်လည်း ဖြစ်ပါတယ်။
လှေထိုးတယ် ဆိုတာ လွယ်မှ လွယ်”
ရယ်သွမ်းသွေး ကဲ့ရဲ့လာတယ်။

ကိုလန်ဘတ်က ညင်သာစွာပြုံး
“ဟုတ်ပါပြီလေ လူကြီးမင်း
မိမိက သူများထက် သာတယ်ဆို
လက်တွေ့ သာပြ မဆိုနဲ့  အပို
ကဲ လွယ်လွယ်မေးမယ် ဒီပုစ္ဆာတစ်ခု
ဟောဒီက တစ်လုံးသော ကြက်ဥ
အကူမပါ အထူမပါ
ပြားသောဒီစားပွဲပေါ်
မလဲအောင် မားမားမတ်မတ်
ဘယ်သူများက ထောင်တတ်ပါသလည်း
တတ်နိုင်ရင်လက်တွေ့ ပြ
ချီးကျူးရန် ၀န်မလေးလှ”

ခန်းမအလည် ..
တယောက် မှ တယောက်
တလက် မှ တလက်
လက်ဆင့်ကမ်းတဲ့ ကြက်ဥတစ်လုံး.

ကြံရာမရ ပညာရှိ ယောင်ယောင်
ဟန်ဆောင် ဂုဏ်သရေရှိ လူကြီးမင်းများ
ကြက်ဥကို ဖင်ပြန် ခေါင်းပြန်ကြည့်
အသွင်မတူ..အပြားပေါ် အခုံးထပ်
ဘယ်လိုလုပ်ပြီး..
မှန်စားပွဲ ပြင်ညီ ပေါ် ကြက်ဥကို မတ်တပ်
ဘယ်လိုရပ်ရပါ့
ဖင်က ထောင်မလား..
ခေါင်းက ထောင်မလား..
လား. လား လား..???
ခေါင်းမွှေးသာပြောင်.
အဖြေကို မဖော်ဆောင်နိုင်ဘူး။

လက် များစွာပြောင်းလဲ
နောက်ဆုံး.. အဖြေမရှိ
ကိုလန်ဘတ် လက်ထဲ ကြက်ဥ ပြန်ရောက်ရှိ

“ကဲကဲ..
ဘယ်သူမှ မထောင်နိုင်တာ သေချာပြီလား..
ဒါဆို ကျူပ်ထောင်ပြမယ် ဒီမှာကြည့်”

ကြက်ဥရဲ အောက်ခြေ လုံးသော နေရာကို
စားပွဲပေါ် ဆတ်ကနဲ ဆောင့်ချ
ဂွပ်ကနဲ နဲ့ ဖင်ပြားသွားသော ကြက်ဥ
ထောင်နေတာ..ဥပမာပြု

“ဟာ”ကနဲ က ပရိဿာတ်
ဒီလိုဆိုတော့ အဟုတ်သားလား.
ကြည့်တော့လည်း လွယ်လွယ်လေးပါလား.

ကဲရဲ့သူများ ကတော့ အရှက်ပြေမျက်နှာပိုးသတ်
" အော် ဒီလိုသာဆို ငါတို့လည်း
ထောင်တတ်တာပေါ့ ဒီကြက်ဥ
လွယ်လွယ်ကလေးဘဲ ဘာခက်သလည်း”

ကိုလံဘတ်စ်က
" ကဲ မ်ိတ်ဆွေ..တကယ်တတ်ပါရင်
အခုနကပဲ ကြက်ဥကလေး ထောင်ပြ
ကိုယ်တိုင်ကျလည်း မလုပ်တတ်ကြ
သူခိုးပြေးမှ ထိုးကွင်းထ
သူများလုပ်ပြီးခါမှ လာမကဲ့ရဲ့
အခုမှလာ ငါတတ်ပါတယ် ပြောမနေနဲ့
သူများလုပ်ပြမှ ခိုးချလိုက်
ဒါဆို သင်ဟာ သူများရဲ့ နောက်လိုက်"

ဒီ ကြက်ဥပုစ္ဆာနှယ်
လုပ်တတ်ရင် လွယ်..
မလုပ်တတ်ရင် ခက်
လက်ညှိုးထိုးရန် လွယ်..
ဖောက်ထွက်ဖို့ ကခက်
မတူတဲ့တိုင်းရင်းသား..
တူယှဉ်ငြိမ်းချမ်းနေထိုင်ရေး.
ဗိုလ်ချုပ်လက်ထက်မှာ..သွေးစည်းရေး
ပင်လုံမှာ စာချူပ်ရေးခဲ့တယ်။

ယုံကြည်စိတ်ချသူသာ
စည်းရုံးရာအောင်မြင်ရာပေါ့။
ဗိုလ်ချုပ်တော်တို့ သမီးတော်တာမဟုတ်။
သမီးတော်လို့  လူကြည်ညိုတယ်။
ကဲ ထောင်ရခက်တဲ့ ကြက်ဥ
ညှိနှိုင်းခက်တဲ့ ဒုတိယ ပင်လုံ.
တောင်ပေါ်မြေပြန့် သွေးစည်းချစ်ကြည်
မလုပ်တတ်သူတွေ ဘေးဖယ်နေစေချင်သည်။

ကိုလံဘတ်(စ်)ရဲ့ နိယာမ
အတွေးအခေါ်သန် အရည်အချင်းမှန်
တတ်နိုင်သူ ဦးဆောင်ကြ
ကိုယ်တိုင်လုပ်ခွင့်ကြုံတုန်းက မလုပ်နိုင်..ဖျင်းစွ.
တတ်သူ လုပ်ပြတဲ့အခါမှ မဲ့ရွဲ့ ကဲ့ရဲ့တဲ့ ဒီပါးစပ်
ခွေးလောက်မှ အဖိုးမတန်..
မြန်မာ အမျိုးမမှန်။

ချိတ်လုံချည် ၀တ်တိုင်းခေါင်းဆောင်မဟုတ်
ပြည်သူလေးစားမှ ခေါင်းဆောင်ဖြစ်တယ်။

မသဒ္ဓါ (၁။၅။၂၀၁၀)

တိုင်းပြည်ကြီးပွားစေချင်ရင်- ဗမာကတမျိုး၊ ကရင်ကတဖုံ၊ ရှမ်း၊ ကချင်၊ ချင်းတို့က တခြား အကွဲကွဲအပြားပြား လုပ်နေကြရင်ဖြင့် အကျိုးရှိမှာ မဟုတ်ဘူး၊ စုပေါင်းလုပ်ကြမှသာ အကျိုးရှိနိုင်မည်”
*ဗိုလ်ချုပ်အောင်ဆန်း*

၂၁ ရာစုနဲ့ ကိုက်ညီတဲ့ ပင်လုံညီလာခံ ကျင်းပသင့်တယ်။ “ဒုတိယပင်လုံ (၀ါ) ၂၁ ရာစု ပင်လုံညီလာခံဆိုတာဟာ ထိပ်တိုက်ရင်ဆိုင်တွေ့ရေးလမ်းကို သွားနေတာ(စိမ်ခေါ်တာ) မဟုတ်ပါ။
အမျိုးသား ရင်ကြားစေ့ရေးအတွက် ရည်ရွယ်ပြီး စစ်မှန်တဲ့ ပြည်ထောင်စု ပေါ်ထွန်းဖို့အထောက်အပံ့တစ်ခုသာဖြစ်တယ်
စင်ပြိုင်အစိုးရလည်း မဟုတ်သလို စင်ပြိုင်လွှတ်တော်လည်း မဟုတ်ပါ။
စင်ပြိုင်ညီလာခံလည်း မဟုတ်။ ဘာဆို ဘာမှ မဟုတ်ဘူးဆိုတာ တပ်မတော်မှ နားလည်မှုလွဲနေတာကို ရှင်းလင်းအောင် ပထမကြိုးစားသွားရမှာပါ။

ဒေါ်အောင်ဆန်းစုကြည်